പരീക്ഷ പേടിയിൽ കുട്ടി തട്ടിക്കൊണ്ടുപോകൽ കഥ മെനഞ്ഞു; യുവാക്കളെ നാട്ടുകാർ പൊതിരെ തല്ലി

മലപ്പുറം: കൊണ്ടോട്ടി ഓമല്ലൂരിൽ ആൾക്കൂട്ടം യുവാക്കളെ വളഞ്ഞിട്ട് തല്ലിയ സംഭവത്തിൽ വഴിത്തിരിവ്. തട്ടിക്കൊണ്ടുപോയെന്ന് 14 കാരനായ കുട്ടി കഥ മെനഞ്ഞതിനെത്തുടർന്നാണ് യുവാക്കളെ ആൾക്കൂട്ടം മർദ്ദിച്ചത്. രക്തം ഛർദ്ദിച്ചിട്ടും നാട്ടുകാർ മർദ്ദനം നിർത്തിയില്ലെന്ന് യുവാക്കൾ പറഞ്ഞു. സംഭവത്തിൽ നാട്ടുകാരായ 40 പേർക്കെതിരെ പോലീസ് കേസെടുത്തു.

സംഭവത്തിൽ മൂന്നുപേരുടെ അറസ്റ്റ് രേഖപ്പെടുത്തിയിട്ടുണ്ട്. കോഴിക്കോട്ടെ സ്വകാര്യ ആശുപത്രിയിൽ ചികിത്സയിലാണ് യുവാക്കൾ. ഓണ പരീക്ഷ കഴിഞ്ഞ് പേപ്പർ കിട്ടുമ്പോൾ മാർക്ക് കുറയുമെന്ന ആശങ്കയിലാണ് കുട്ടി തട്ടിക്കൊണ്ടുപോകൽ കഥ മെനഞ്ഞതെന്ന് പോലീസ് പറഞ്ഞു. തട്ടിക്കൊണ്ടുപോകാൻ ശ്രമിച്ചവരെന്ന് കുട്ടി പറഞ്ഞതിന്റെ അടിസ്ഥാനത്തിലാണ് യുവാക്കളോട് പോലീസ് സ്റ്റഷനിലേക്കെത്താൻ പോലീസ് നിർദ്ദേശിച്ചിരുന്നു.

പോലീസ് സ്റ്റേഷനിലേക്ക് പോകുകയായിരുന്ന വാഴക്കാട് ചീരോത്ത് റഹ്മത്തുല്ല, കൊണ്ടോട്ടി കുറുപ്പത്ത് സഫറുല്ല എന്നിവരെ നാട്ടുകാർ തടഞ്ഞുവെച്ചു. കാറിലുള്ളവർ തന്ന തട്ടിക്കൊണ്ടു പോകാൻ ശ്രമിച്ചെന്ന് കുട്ടി ഉറപ്പിച്ചു പറഞ്ഞതോടെ നാട്ടുകാർ യുവാക്കളെ മർദ്ദിക്കുകയായിരുന്നു.

രക്തം ഛർദ്ദിച്ചിട്ടും നാട്ടുകാർ മർദ്ദനം അവസാനിപ്പിച്ചില്ല. പോലീസ് എത്തിയിട്ടും വിട്ടുകൊടുക്കാതെ മർദ്ദനം തുടർന്നു. നിരപരാധികളെന്ന് മനസിലായവർ തടയാൻ എത്തിയപ്പോൾ അവരെയും നാട്ടുകാർ മർദ്ദിച്ചെന്ന് യുവാക്കൾ പറഞ്ഞു. സംഭവത്തിൽ 40 പേർക്കെതിരെ വധശ്രമം അടക്കമുള്ള വകുപ്പുകൾ ചുമത്തി കേസെടുത്തതായി പോലീസ് പറഞ്ഞു.

RELATED STORIES