ഡല്‍ഹിയിലെ കൊവിഡ് അതിരൂക്ഷം; അമിത് ഷാ- കെജ്രിവാള്‍ കൂടിക്കാഴ്ച നാളെ

ന്യൂഡല്‍ഹി: രാജ്യതലസ്ഥാനത്ത് കുത്തനെ ഉയരുന്ന കൊവിഡ് സാഹചര്യം ചര്‍ച്ച ചെയ്യാന്‍ ഞായറാഴ്ച കേന്ദ്ര ആഭ്യന്തരമന്ത്രി അമിത് ഷായും മുഖ്യമന്ത്രി അരവിന്ദ് കെജ്രിവാളും കൂടിക്കാഴ്ച നടത്തും. കേന്ദ്ര ആരോഗ്യമന്ത്രി ഡോ. ഹര്‍ഷ് വര്‍ദ്ധന്‍, ലഫ്റ്റനന്റ് ഗവര്‍ണര്‍ അനില്‍ ബയ്ജലും ചര്‍ച്ചയ്ക്ക് പങ്കെടുക്കും. ഞായറാഴ്ച രാവിലെ 11 മണിയ്ക്കാണ് കൂടിക്കാഴ്ച.

കഴിഞ്ഞ കുറച്ചു ദിവസങ്ങളായി ഡല്‍ഹിയില്‍ ആശങ്കയുണ്ടാക്കും വിധത്തില്‍ ഉയര്‍ന്ന കൊറോണ വൈറസ് സ്ഥിതി അവലോകനം ചെയ്യാനാണ് കൂടിക്കാഴ്ച നടത്തുന്നത്. സംസ്ഥാന ദുരന്തനിവാരണ മാനേജ്‌മെന്റ് അതോറിറ്റി (എസ്ഡിഎംഎ) അംഗങ്ങള്‍, ഡോ. റണ്‍ദീപ് ഗുലേറിയ, എഐഐഎംഎസ് ഡയറക്ടര്‍ (ഓള്‍ ഇന്ത്യ ഇന്‍സ്റ്റിറ്റ്യൂട്ട് ഓഫ് മെഡിക്കല്‍ സയന്‍സസ്), മറ്റു മുതിര്‍ന്ന ഉദ്യോഗസ്ഥര്‍ എന്നിവര്‍ ചര്‍ച്ചയില്‍ പങ്കെടുക്കും. ആഭ്യന്തര മന്ത്രാലയ ഓഫീസ് ട്വീറ്ററിലൂടെയാണ് ഇക്കാര്യം അറിയിച്ചത്.

വെള്ളിയാഴ്ച ഡല്‍ഹിയില്‍ 2,137 പുതിയ കൊവിഡ് കേസുകളാണ് റിപ്പോര്‍ട്ട് ചെയ്തത്. ആദ്യമായാണ് കൊവിഡ് രോഗികള്‍ രാജ്യതലസ്ഥാനത്ത് 2,000 കടക്കുന്നത്. രാജ്യത്ത് കൊവിഡ് ഏറ്റവും മോശമായി ബാധിച്ച മൂന്നാമത്തെ സംസ്ഥാനമാണ് ഡല്‍ഹി. ഡല്‍ഹിയില്‍ ഇതുവരെ കൊവിഡ് കേസുകള്‍ 36,000 കടന്നു. മരണസംഖ്യ 1,214 ആയി.

RELATED STORIES