ശ്രീജിവിന്‍റേത് കസ്റ്റഡി മരണമല്ല; ആത്മഹത്യയെന്ന് സിബിഐ റിപ്പോര്‍ട്ട്

തിരുവനന്തപുരം: പാറശാലയില്‍ പൊലീസ് കസ്റ്റഡിയിലായിരുന്ന ശ്രീജിവ് ദുരൂഹസാഹചര്യത്തില്‍ മരിച്ച സംഭവം ആത്മഹത്യയെന്ന് സിബിഐ. കേസിന്‍റെ റിപ്പോര്‍ട്ട് അന്വേഷണസംഘം സിബിഐ കോടതിയില്‍ സമര്‍പ്പിച്ചു. കസ്റ്റഡിയിലെടുക്കുമ്പോള്‍ തന്നെ ശ്രീജിവ് വിഷം കയ്യില്‍ കരുതിയിരുന്നെന്നും പൊലീസ് ദേഹ പരിശോധന നടത്താതെ സെല്ലിലിടുകയായിരുന്നെന്നുമാണ് റിപ്പോര്‍ട്ട് പറയുന്നത്.

തിരുവനന്തപുരം സിജെഎം കോടതിയിലാണ് സിബിഐ ഇതുസംബന്ധിച്ച റിപ്പോര്‍ട്ട് സമര്‍പ്പിച്ചിരിക്കുന്നത്. ആത്മഹത്യക്കുറിപ്പ് മുന്‍നിര്‍ത്തിയാണ് സിബിഐ റിപ്പോര്‍ട്ട്. ഇയാള്‍ ആറ്റിങ്ങലില്‍ താമസിച്ചിരുന്ന ലോഡ്ജില്‍ നിന്നായിരുന്നു ആത്മഹത്യാകുറിപ്പ് കണ്ടെത്തിയത്. പൊലീസ് സ്റ്റേഷനില്‍ നിന്ന് ആശുപത്രിയിലെത്തിച്ചത് വിഷം ഉള്ളില്‍ ചെന്ന നിലയിലാണെന്ന ഡോക്ടറുടെ മൊഴിയും സിബിഐ റിപ്പോര്‍ട്ടിലുണ്ട്. 

2014 മെയ് 21 നാണ് പാറശാല പൊലീസിന്‍റെ കസ്റ്റഡിയിലായിരുന്ന ശ്രീജിവ് ദുരൂഹ സാഹചര്യത്തില്‍ മരണപ്പെടുന്നത്. കേസ് ആദ്യം അന്വേഷിച്ച പൊലീസ് കംപ്ലയിന്‍റ് അതോറിറ്റി മരണം കൊലപാതകമാണെന്നാണ് കണ്ടെത്തിയതെങ്കിലും ക്രൈംബ്രാഞ്ച് സംഘം ആത്മഹത്യ എന്ന നിഗമനത്തിലേക്ക് എത്തുകയായിരുന്നു.

സഹോദരന്‍റെ ദുരൂഹ മരണത്തില്‍ യഥാര്‍ത്ഥ പ്രതികളെ നിയമത്തിന് മുന്നിലെത്തിക്കണമെന്ന് ആവശ്യപ്പെട്ട് ശ്രീജിവിന്‍റെ സഹോദരന്‍ ശ്രീജിത്ത് സെക്രട്ടറിയേറ്റിനുമുന്നില്‍ സമരം ചെയ്യുകയാണ്. ശ്രീജിത്തിന്‍റെ സമരം ശ്രദ്ധനേടിയതിനു പിന്നാലെയായിരുന്നു കേസ് സിബിഐയ്ക്ക് വിട്ടത്. എന്നാല്‍ ആത്മഹത്യയാണെന്ന നിഗമനത്തിലേക്കാണ് സിബിഐ അന്വേഷണസംഘവും എത്തിയിരിക്കുന്നത്. 

RELATED STORIES