కొలంబోలో వరుస బాంబు పేలుళ్లు.. భాగ్యనగరంపై ఎన్ఐఏ డేగకన్ను!

కొలంబోలో వరుస పేలుళ్ల నేపథ్యంలో ఐసిస్‌ సానుభూతిపరులకు అడ్డాగా మారిన భాగ్యనగరంపై నిఘా వర్గాలు దృష్టిసారించాయి. రెండేళ్ల కిందట హైదరాబాద్‌లో కొలంబో తరహా విధ్వంసానికి పన్నిన కుట్రను అప్పట్లో నిఘా వర్గాలు నిర్వీర్యం చేశాయి. అప్పటి నుంచి వరుసలో నగరంలో ఐసిస్‌ ఆనవాళ్లు బయటపడుతూనే ఉన్నాయి. కొలంబో దాడులకు ముందు రోజు జాతీయ దర్యాప్తు సంస్థ మైలార్‌దేవ్‌పల్లిలో సోదాలు నిర్వహించి కీలకమైన ఆధారాలను స్వాధీనం చేసుకుంది. నలుగురు సానుభూతిపరులను అదుపులోకి తీసుకుంది. మరింత మంది మద్దతుదారులు ఉండవచ్చని అనుమానిస్తున్న అధికారులు కొలంబో దాడుల తర్వాత మరింత అప్రమత్తమయ్యారు. అల్‌ఖైదా, లష్కరే తొయిబాల మాదిరిగా దక్షిణాసియాలో తన ఉనికి చాటుకోవాలని ఐసిస్ ప్రయత్నాలు చేస్తోంది. ఇందులో భాగంగానే బంగ్లాదేశ్, మాల్దీవులు, ఇండోనేషియాలో పలు చోట్ల విధ్వంసాలకు పాల్పడింది. 

హైదరాబాద్‌లో భారీ మారణహోమానికి 2016లోనే ఐసిస్‌ వ్యూహరచన చేసింది. ఈ దాడుల కోసం అనుబంధ సంస్థ జుంద్‌ ఉల్‌ ఖలీఫా అల్‌ హింద్‌ ఫి బిలాద్‌ తరఫున ఎనిమిది మంది ముఠాగా ఏర్పడ్డారు. నగరంలోని వ్యాపార, వాణిజ్య సముదాయాలు, ప్రభుత్వ భవనాలు, పోలీస్‌స్టేషన్లను లక్ష్యంగా బాంబులు పేల్చాలని కుట్రపన్నారు. సిరియాలోని అగ్రనాయకత్వం ఆదేశాలతో అబ్దుల్లా బిన్‌ అల్‌ అహ్మద్‌ అమోది నేతృత్వంలో ఏర్పడ్డ ఈ ముఠా బాంబుల తయారీకి ప్రత్యేకంగా ల్యాబ్‌ను ఏర్పాటు చేసుకుంది. హబీబ్‌ మహ్మద్‌ అనే వ్యక్తి ఇంట్లో ఏర్పాటుచేసిన ఈ ల్యాబొరెటరీని చూసి అధికారులు విస్తుపోయారు. అత్యంత శక్తిమంతమైన బాంబులు తయారీకి ప్రయోగాలు చేసి, ఇందుకోసం యూరియా, క్లోరో-9, మిథైల్‌ ఎసిడ్రిన్‌, మిథైల్‌క్లోరైడ్‌, ఎసిటోన్‌, హైడ్రోజన్‌ పెరాక్సైడ్‌, నైట్రిక్‌ యాసిడ్‌తోపాటు ఇనుప మేకులు, స్టీల్‌ బాల్స్ కూడా సమకూర్చుకున్నారు. 

బాంబులుతోపాటు తుపాకులతోనూ కాల్పులు జరిపి మారణహోమం సృష్టించాలని పథకం వేశారు. దీనికి అవసరమైన ఆయుధాలు కూడా సమకూర్చుకోగా విశ్వసనీయ సమాచారంతో రంగంలోకి దిగిన ఎన్ఐఏ ఈ ముఠా గుట్టు రట్టు చేసింది. అదే జరిగుండకపోతే అప్పట్లోనే పెను విధ్వంసం జరిగేది. ఆ ఉదంతం జరిగింది మొదలు క్రమం తప్పకుండా హైదరాబాద్‌లో ఐసిస్‌ సానుభూతిపరులు పుట్టలో పాముల్లా బయటపడుతున్నారు. వీహెచ్‌పీ నేతను హైదరాబాద్‌లో హత్యచేయడానికి కుట్ర పన్నిన మహ్మద్‌ అబ్దుల్లా బాసిత్‌‌ను గతేడాది అరెస్ట్ చేశారు. అతడు ఒక్కడే నగరానికి చెందిన పదుల సంఖ్యలో యువకులను ఐసిస్‌ వైపు వెళ్లేలా ప్రేరేపించినట్లు గుర్తించారు. అతడి అనుచరులుగా భావిస్తున్న జీషాన్‌, మసూద్‌ తోహాజ్‌, షిబ్లీ బిలాల్‌లతోపాటు మహారాష్ట్రలో ఉన్న బాసిత్‌ రెండో భార్య మోనలను ఎన్ఐఏ తాజాగా విచారిస్తోంది. వీరితోపాటు చాలా మంది అజ్ఞాతంలో ఉంటారని అధికారులు అనుమానిస్తున్నారు. 

RELATED STORIES