ലിബിയന്‍ യുദ്ധത്തിന്‍റെ ഭീകരമുഖം വെളിവാക്കി കൂട്ടക്കുഴിമാടങ്ങള്‍; ഭയപ്പെടുത്തുന്നതെന്ന് യുഎന്‍

ട്രിപ്പോളി: ആഭ്യന്തര കലാപം രൂക്ഷമായ ലിബിയയില്‍ കണ്ടെത്തിയ കൂട്ടക്കുഴിമാടങ്ങല്‍ ഭയപ്പെടുത്തുന്നതാണെന്ന് ഐക്യരാഷ്ട്ര സഭ. മുന്‍ സൈനികനായ ഖലിഫ ഹഫ്‍തറിന്‍റെ നേതൃത്വത്തിലുള്ള വിമതരില്‍ നിന്ന് അന്താരാഷ്ട്ര അംഗീകാരമുള്ള ലിബിയന്‍ സര്‍ക്കാര്‍ പിടിച്ചെടുത്ത പ്രദേശത്താണ് കൂട്ടക്കുഴിമാടങ്ങള്‍ കണ്ടെത്തിയത്.

നിരവധി മൃതദേഹങ്ങള്‍ ഒരുമിച്ച് കുഴിച്ചിട്ടിരിക്കുന്ന എട്ടിലേറെ കൂട്ടക്കുഴിമാടങ്ങളാണ് കണ്ടെത്തിയത്. കുഴിമാടങ്ങളില്‍ ഭൂരിഭാഗവും പടിഞ്ഞാറന്‍ ലിബിയയിലെ ടര്‍ഹുന നഗരത്തിലാണ് കണ്ടെത്തിയത്. ഹഫ്‍തറിന്‍റെ അവസാനത്തെ ശക്തികേന്ദ്രമായിരുന്നു ടര്‍ഹുന. 14 മാസം നീണ്ട യുദ്ധകാലത്ത് ഹഫ്‍തറിന്‍റെ സൈന്യത്തിന്‍റെ പ്രധാന കേന്ദ്രമായിരുന്നു ടര്‍ഹുന.

കുഴിമാടങ്ങള്‍ കണ്ടെത്തിയ സംഭവം ഭീകരമാണെന്ന് യുഎന്നിന്‍റെ ലിബിയ സപ്പോര്‍ട്ട് മിഷന്‍ ട്വീറ്ററില്‍ കുറിച്ചു. സംഭവത്തില്‍ അന്താരാഷ്ട്ര നിയമങ്ങളുടെ അടിസ്ഥാനത്തില്‍ സമഗ്രമായ അന്വേഷണം വേണെമെന്നും യുഎന്‍ മിഷന്‍ നിര്‍ദേശിച്ചു.

അന്താരാഷ്ട്ര അംഗീകാരമുള്ള ലിബിയന്‍ സര്‍ക്കാര്‍ ജൂണ്‍ അഞ്ചിനാണ് ടര്‍ഹുനയില്‍ കുഴിമാടങ്ങള്‍ കണ്ടെത്തിയത്. നൂറിലേറെ മൃതദേഹങ്ങള്‍ കുഴിമാടത്തിലുള്ളതായാണ് റിപ്പോര്‍ട്ട്.

ഹഫ്‍തറിന്‍റെ സംഘം പിടികൂടിയ ലിബിയന്‍ സര്‍ക്കാര്‍ സേനാംഗങ്ങളുടെയും സാധാരണക്കാരുടെയും മൃതദേഹങ്ങഴാണ് ഇവിടെ കുഴിച്ചിട്ടതെന്ന് ലിബിയന്‍ സര്‍ക്കാര്‍ അറിയിച്ചു. ലിബിയന്‍ യുദ്ധത്തിന്‍റെ ഭീകരമുഖമാണ് ഈ കുഴിമാടങ്ങള്‍ വെളിച്ചത്ത് കൊണ്ടുവരുന്നത്.

കുഴിമാടങ്ങള്‍ കണ്ടെത്തിയ സംഭവം അന്വേഷിക്കാന്‍ ലിബിയന്‍ സര്‍ക്കാര്‍ പ്രത്യേക സമതിയ നിയോഗിച്ചു. കുഴിമാടങ്ങളുടെ സംരക്ഷണം ഉറപ്പാക്കണമെന്നും ഇരകളാരൊക്കെയെന്ന് കണ്ടുപിടിക്കണമെന്നും സമിതി അംഗങ്ങള്‍ക്ക് നിര്‍ദേശം നല്‍കി. മരണകാരണം കണ്ടെത്തണമെന്നും മൃതദേഹങ്ങള്‍ വീണ്ടെടുത്ത് അടുത്ത ബന്ധുക്കള്‍ക്ക് കൈമാറണമെന്നും യുഎന്‍ മിഷന്‍ നിര്‍ദേശിച്ചു.

നൂറുകണക്കിനാളുകളെ കാണാതായതായി മാര്‍ച്ചില്‍ റിപ്പോര്‍ട്ടുകള്‍ ലഭിച്ചിരുന്നുവെന്ന് യുഎന്നിന്‍റെ ലിബിയ സപ്പോര്‍ട്ട് മിഷന്‍ പറയുന്നു. ടര്‍ഹുനയിലെ മുഴുവന്‍ കുടുംബങ്ങളും ഹഫ്‍തറിന്‍റെ സൈന്യത്തിന്‍റെ പീഡനങ്ങളേറ്റവരാണ്. പലരും കൊല്ലപ്പെടുകയോ കാണാതാവുകയോ ചെയ്‍തു. ഇരകളില്‍ സാധാരണക്കാരും സൈനികരും സന്നദ്ധ പ്രവര്‍ത്തകരും ഉദ്യോഗസ്ഥരുമെല്ലാം ഉള്‍പ്പെടും.- യുഎന്‍ സമിതി പറയുന്നു.

സെപ്റ്റംബര്‍ 13-ന് ടര്‍ഹുന ജയിലില്‍ നിരവധിയാളുകളെ വധശിക്ഷയ്‍ക്ക് വിധേയരാക്കിയാതായുള്ള റിപ്പോര്‍ട്ടുകളും ലഭിച്ചിട്ടുണ്ടെന്ന് യുഎന്‍ സമിതി വ്യക്തമാക്കി.

RELATED STORIES