കഥാകാരി അഷിത അന്തരിച്ചു

കൊച്ചി: ചെറുകഥാകൃത്ത്, കവി, വിവര്‍ത്തക തുടങ്ങിയ മേഖലകളില്‍ പ്രശസ്‍തയായ മലയാള സാഹിത്യകാരി അഷിത അന്തരിച്ചു. തൃശൂരിലെ സ്വകാര്യ ആശുപത്രിയില്‍ ആയിരുന്നു അന്ത്യം. ദീര്‍ഘകാലമായി അര്‍ബുദ ബാധിതയായിരുന്നു. 

കഴിഞ്ഞ ജൂലൈയില്‍ അര്‍ബുദ ചികിത്സയെക്കുറിച്ചുള്ള ഒരു കുറിപ്പ് അഷിതഫേസ്‍ബുക്കില്‍ കുറിച്ചിരുന്നു. 

"എൻ്റെ ജീവിതത്തിലെ ഏറ്റവും പ്രധാനപ്പെട്ട സംഭവം കാൻസർ തന്നെയാണ്. യാതനയും വേദനയും സ്നേഹവും പരമോന്നത ബോധവും അതാണ് എനിക്ക് നൽകിയത്. അതെ , മനുഷ്യർ മരിക്കും. പക്ഷെ മനുഷ്യർ അതി ജീവിക്കുകയും ചെയ്യുന്നുണ്ട് . കാൻസറിൻ്റെ ലോകം വല്ലാത്തൊരു ലോകമാണ്. ഒരു കാൻസർ വാർഡിൽ നിങ്ങള്ക് ചിരി വരികയില്ല. പുരികം ഇല്ലാത്ത, കൺപ്പീലികളില്ലാത്ത, മുടി കൊഴിഞ്ഞ മുഖങ്ങൾ, കുട്ടികൾ, ഹതാശമായ നോട്ടങ്ങൾ, അടക്കിയ കണ്ണുനീർ ... കാൻസർ വന്നവരേക്കാൾ അവരെ സ്നേഹിക്കുന്നവരുടെ സങ്കടം ആണ് കൂടുതൽ ഉലക്കുക" അവര്‍ ഫേസ്‍ബുക്കില്‍ എഴുതി 

തൃശ്ശൂര്‍ ജില്ലയില്‍ പഴയന്നൂരില്‍ ആണ് അഷിത ജനിച്ചത്. ഡല്‍ഹി, മുംബെ എന്നിവിടങ്ങളില്‍ സ്കൂള്‍ വിദ്യാഭ്യാസത്തിന് ശേഷം എറണാകുളം മഹാരാജാസ് കോളേജില്‍ നിന്ന് ഇംഗ്‌ളീഷില്‍ ബിരുദാനന്തര ബിരുദം നേടി. കേരളം സാഹിത്യ അക്കാദമി അവാർഡ് ,ഇടശ്ശേരി അവാര്‍ഡ് , അങ്കണം അവാര്‍ഡ് തുടങ്ങിയ പുരസ്‍കാരങ്ങള്‍ നേടിയിട്ടുണ്ട്. 

RELATED STORIES