வங்கக் கடலில் வரும் 29-ம் தேதி புயல்: கனமழைக்கு வாய்ப்பு!

வங்கக் கடலில் வரும் 29-ம் தேதி புயல் உருவாக வாய்ப்புள்ளதாக சென்னை வானிலை ஆய்வு மையம் அறிவித்துள்ளது. 

இதுதொடர்பாக சென்னை வானிலை ஆய்வு மைய இயக்குநர் புவியரசன் இன்று செய்தியாளர்களிடம் கூறியதாவது; வரும் 25-ம் தேதி இந்திய பெருங்கடல் மற்றும் அதையொட்டியுள்ள தென்மேற்கு வங்கக் கடல் பகுதியில் குறைந்த காற்றழுத்த தாழ்வு பகுதி உருவாக வாய்ப்புள்ளது. இது மேலும் வலுவடைந்து 27-ம் தேதி காற்றழுத்த தாழ்வு மண்டலமாக மாறக்கூடும். அதனை தொடர்ந்து அடுத்த இரு நாட்களில் தமிழக கடற்கரையை நோக்கி நகர்ந்து 29-ம் தேதி புயலாக வலுவடையும். இதன் காரணமாக கடலோர மாவட்டங்களில் 29-ம் தேதியிலிருந்து இடியுடன் கூடிய கனமழைக்கு வாய்ப்புள்ளது. 

மேலும் கடந்த 24 மணி நேரத்தில் வெப்பச்சலனத்தின் காரணமாக ஒருசில இடங்களில் மிதமானது முதல் கனமழை வரை பதிவாகியுள்ளது. அதிகபட்சமாக ஆத்தூரில் 10. செ.மீ, பெரியகுளம், தம்பட்டி, சங்கரி துர்க்கம் ஆகிய பகுதிகளில் தலா 6 செ.மீ, திருவண்ணாமலை, ஓசூர் பகுதிகளில் தலா 5 செ.மீ மழையும் பதிவாகி உள்ளது. 

அடுத்த 24 மணி நேரத்தில் ஈரோடு, சேலம், கோயம்புத்தூர், நீலகிரி, திருப்பூர், தேனி, திண்டுக்கல், மதுரை, திருநெல்வேலி, விருதுநகர், கன்னியாகுமரி, திருவாரூர், தஞ்சாவூர் ஆகிய மாவட்டங்களில் சில இடங்களில் லேசானது முதல் மிதமான மழைக்கு வாய்ப்புள்ளது.
சென்னையை பொருத்தவரை வானம் ஓரளவு மேகமூட்டத்துடன் காணப்படும். அதிகபட்சமாக 30 டிகிரி செல்சியஸூம், குறைந்தபட்சம் 28 டிகிரி செல்சியஸ் வெப்பநிலையும் பதிவாகும் என்று சென்னை வானிலை ஆய்வு மையம் தெரிவித்துள்ளது. 

RELATED STORIES